ناوەندەکانی خوێندنی گەشە لە شاری سلێمانی بە فەرمی پڕۆسەی خوێندنی ئۆنلاینیان دەستپێکرد و بە مەبەستی سەرخستنی پڕۆسەکەش، کۆبوونەوەی ڕێنماییان بۆ دایکان و باوکی قوتابیان ئەنجامدا تاوەکو هاوکار و پشتیوانی فێربوونی منداڵەکانیان بن.
ئەمڕۆ لە ناوەندەکانی خوێندنی گەشە لە سلێمانی، پێشوازییەکی فراوان لە دایکان و باوکانی قوتابییە ئازیزەکان کرا. ئامانجی ئەم دیدارە ئاشناکردنی خێزانەکان بوو بە سیستەمی خوێندنی ئۆنلاین و پێدانی ڕێنمایی پێویست بۆ ئەوەی بتوانن لە ماڵەوە چاودێرییەکی وردی ئاستی زانستیی منداڵەکانیان بکەن و هاوکار بن لە سەرخستنی ئەم شێوازە نوێیەی خوێندن.
ئیدارەی گەشەی سلێمانی ئاماژەی بەوە دا، کە هەماهەنگی نێوان ناوەندەکانی خوێندن و خێزانەکان لەم قۆناغەدا زۆر گرنگە، بۆ ئەوەی دڵنیایی بدرێت کە قوتابیان بە باشترین شێوە وانەکانیان وەردەگرن و هیچ بۆشاییەکی زانستییان بۆ دروست نابێت. جەختیش کرایەوە کە هەموو ئامادەکارییەک کراوە تاوەکو قوتابیان لە ڕێگەی سەکۆ ئەلیکترۆنییەکانەوە بەوپەڕی سەرکەوتوویی لە کاروانی خوێندنیان بەردەوام بن.
