لەگەڵ دەستپێکی ساڵی نوێی خوێندن و لە کەشێکی پڕ لە ئومێد و وزەدا، کۆمەڵگەی پەروەردەیی گەشە لە شاری هەولێر دەرگاکانی بە ڕووی خوێندکارە ئازیزەکانیدا واڵا کرد و بە دروشمی "بەخێربێنەوە گوڵەکانی گەشە بۆ ماڵی دووەمتان" پێشوازی لە نەوەی نوێ و قاڵبکەرانی داهاتوو کرد.
بە مەبەستی ڕەخساندنی ژینگەیەکی پەروەردەیی گونجاو و ئامادەکردنی دەروونی خوێندکاران بۆ ساڵێکی نوێی پڕ لە سەرکەوتن، ستافی کارگێڕی و مامۆستایانی کۆمەڵگەکە بە گوڵ و شیرینی پێشوازییان لە خوێندکاران کرد. ئەم دەستپێکە وەک نەریتێکی ساڵانەی گەشە، ئامانج لێی دووپاتکردنەوەی ئەو پەیامەیە کە قوتابخانە تەنها ناوەندێکی زانستی نییە، بەڵکو ماڵێکی ئارام و پڕ لە میهرەبانییە بۆ گەشەپێدانی بەهرە و تواناکانی خوێندکاران.
بەڕێوەبەرایەتی کۆمەڵگەکە لەگەڵ دەستپێکی خوێندن، ئامادەکارییە تەواوەکانی بۆ دابینکردنی ژینگەیەکی پێشکەوتووی خوێندن و جێبەجێکردنی پلانە پەروەردەییەکان دووپات کردەوە، تاوەکو خوێندکاران بتوانن لە پاڵ لایەنی زانستیدا، لە ڕووی پەروەردەیی و کۆمەڵایەتیشەوە ئاستێکی باڵا بەدەست بهێنن.
شایەنی باسە، کۆمەڵگەی پەروەردەیی گەشە هەموو هەوڵێکی خۆی خستووەتە گەڕ بۆ ئەوەی ئەمساڵی خوێندن ببێتە وێستگەیەکی گرنگ لە ژیانی زانستی خوێندکاران و تێیدا بگەنە لوتکەی سەرکەوتن.
